Sakkiasie Arreak and Terry Ryan, 1964
ᑕᐃᑲᓂ ᓯᕗᓪᓕᖅᐹᖅ ᐃᖅᑲᓇᐃᔮᖅᑕᕋᒥ ᐅᑭᐅᖅᑕᖅᑐᒥ, ᐅᓚᐃᔭᓐ ᓯᓚᓐᓂᐊᖅᑎᐅᓚᐅᖅᑐᖅ ᓯᓚᓐᓂᐊᕐᕕᖓᓂ ᑲᖏᖅᖢᒑᐱᒃ ᐊᕙᑖᓂ 1956 ᐊᒻᒪᓗ 1958. ᑕᐃᑲᓂ 1960, ᐅᑎᖅᖢᓂ ᐅᑭᐅᖅᑕᖅᑐᒧᑦ, ᑭᓯᐊᓂᓕ ᓴᓇᖑᐊᖅᓯᒪᔪᓂᒃ ᐅᖃᐅᔾᔪᐃᔨᐅᓪᓗᓂ ᐊᒻᒪᓗ ᐊᖓᔪᖅᑳᖑᓪᓗᓂ ᓴᓇᔨᓄᑦ ᑭᓐᖓᓂ ᑎᑎᑦᑐᒐᕐᕕᖓᓂ. ᐃᓗᐊᓂ ᐅᑭᐅᑦ ᒪᕐᕉᒃ, ᐅᓚᐃᔭᓐ ᐅᔾᔨᕈᓯᓕᓚᐅᖅᑐᖅ ᐅᑯᐊ ᐱᓇᖕᓇᖓᓂ ᐅᑭᐅᖅᑕᖅᑐᖅ ᐊᖕᖏᔪᒻᒪᕆᐋᓗᖕᒥᒃ ᓱᑲᔪᒥᒃ ᐊᓯᑦᔨᖅᐸᓪᓕᐊᖕᒪᑕ. ᐅᓄᕐᓂᖅᓴᐃᑦ ᓄᓇᖃᑎᒋᓐᖏᑕᖏᑦ (ᖃᐅᔨᓴᖅᑎᒻᒪᕇᑦ, ᒐᕙᒪᒃᑯᑦ ᑎᑎᕋᕐᑎᖏᑦ, ᐸᓖᓯᒃᑯᑦ, ᐃᓕᓴᐃᔨᑦ, ᓴᓇᔭᖅᑐᖅᑎᑕᐅᔪᑦ ᐋᕿᒋᐊᓕᖕᓄᑦ) ᑎᑭᖃᑦᑕᓕᖅᑐᑦ ᐅᑭᐅᖅᑕᖅᑐᒧᑦ, ᐊᒻᒪᓗ ᐅᓄᖅᓯᕙᓪᓕᐊᓪᓗᑎᒃ ᐃᓄᐃᑦ ᑎᑭᖃᑦᑕᓕᖅᖢᑎᒃ ᐃᒡᓗᖃᕆᐊᖃᖅᑐᖅᖢᑎᒃ ᓄᑖᓂᒃ ᕿᔪᖕᓂᒃ ᑎᑭᑎᑕᐅᔪᓂᒃ ᖃᓪᓗᓈᑦ ᓄᓇᖏᓐᓂᑦ. ᐅᓚᐃᔭᓐ ᖃᐅᔨᓚᐅᕐᒥᒐᒥ ᐅᑯᐊ ᐊᓯᑦᔨᖅᑐᑦ ᐱᕙᓪᓕᐊᑐᐃᓐᓇᕐᓂᐊᖅᑐᑦ ᐱᔾᔪᑎᒋᓪᓗᒍ ᐃᓕᓐᓂᐊᕆᐊᖅᑎᑕᐅᔪᑦ ᐊᒻᒪᓗ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᔪᑦ, ᐊᒻᒪᓗ ᒐᕙᒪᑐᖃᒃᑯᑦ ᐊᓯᑦᔩᓇᓱᓕᕐᓂᐊᖅᑐᑦ ᐃᓅᓯᖏᓐᓂᒃ "ᖃᓪᓗᓈᑐᐃᓐᓇᕈᖅᑎᓪᓗᒋᑦ" ᑲᓇᑕᒥ ᓄᓇᖃᑎᒌᑎᑐᑦ.
ᑕᐃᑲᓂ 1963 ᐅᓚᐃᔭᓐ ᐆᒃᑐᓚᐅᖅᑐᖅ ᑲᓇᑕᐅᑉ ᑲᑎᒪᔨᖏᓐᓄᑦ ᓴᓇᖑᐊᖅᓯᒪᔪᓄ ᑮᓇᐅᔭᒃᓴᖏᓐᓂᑦ "ᑎᓕᐅᕈᑎᒋᔪᒪᓪᓗᒍ ᐊᒻᒪᓗ ᓄᐊᑦᑎᓗᓂ ᑎᑎᕋᐅᔭᖅᓯᒪᔪᓂᒃ ᐃᓄᖕᓂᑦ ᖁᑎᒃᑐᐃᒥᐅᓂᑦ…ᐊᓯᑦᔨᖅᑕᐅᓗᐊᓚᐅᓐᖏᓂᖏᓂ." ᑐᒃᓯᕋᓚᐅᖅᑐᖅ ᐅᐸᖃᑦᑕᕈᒪᓪᓗᓂ ᐱᖓᓱᓄᑦ ᓄᓇᓕᖕᓄᑦ ᖁᑎᒃᑐᒥ ᕿᑭᖅᑖᓗᖕᒥ - ᑲᖏᖅᖢᒑᐱᒃ, ᒥᑦᑎᒪᑕᓕᒃ ᐊᒻᒪᓗ ᐃᒃᐱᐊᕐᔪᒃ - ᑐᓂᕙᒡᖢᒋᑦ ᐊᓕᓚᔪᕐᓂᒃ ᐸᐃᑉᐹᓂᒃ ᐊᒻᒪᓗ ᑎᑎᕋᐅᑎᓂᒃ ᑎᑭᑦᑕᕌᖓᒥ, ᓂᐅᕕᐊᕆᓪᓗᒋᑦ ᐱᔭᕇᖅᓯᒪᓕᖅᑐᑦ ᑎᑎᖅᑐᒐᖅᓯᒪᔪᑦ ᓇᖕᒥᓂᖅ ᑮᓇᐅᔭᒥᓄᑦ ᐊᐅᓪᓚᖅᐸᓪᓕᐊᓕᕋᒥ. ᐅᓚᐃᔭᓐ ᓂᕈᐊᕆᓚᐅᖅᑕᖏᑦ ᓄᓇᓖᑦ ᖁᑦᑎᒃᑐᒥ ᐅᑯᐊᓗ ᓴᓇᖕᖑᐊᕐᓂᕐᒥᒃ ᖃᐅᔨᒪᓚᐅᓐᖏᑦᑐᑦ ᐃᓕᓐᓂᐊᕈᑎᖃᓚᐅᓐᖏᒻᒪᑕ, ᑕᒪᓐᓇ ᐱᔾᔪᑎᒋᓪᓗᒍ ᐃᒃᐱᒋᓚᐅᕐᒪᒋᑦ ᐅᖃᕈᒪᔭᖏᓐᓂᒃ ᓴᕿᑦᑎᔪᓐᓇᖅᑐᑦ ᑕᒪᐅᓐᓇ, ᓄᖃᖅᑎᑕᐅᔭᓐᖏᓪᓗᑎᒃ ᑕᐅᑦᑐᖏᓐᓂᑦ ᑎᑦᑎᕋᐅᔭᕆᐊᒃᓴᖅ ᐅᑯᐊᓗ ᓇᒻᒪᒋᓇᔭᖅᑕᖏᓐᓂᒃ ᖃᓪᓗᓈᑎᑐᑦ ᐱᓯᒪᔪᓂᑦ.
ᖃᓄᑐᐃᓐᓇᖅ, ᐅᓚᐃᔭᓐ ᐃᓕᓐᓂᐊᕐᑎᑦᑎᓚᐅᓐᖏᑦᑐᖅ ᖃᓄᖅ ᐊᒻᒪᓗ ᑭᓱᓂᒃ ᐃᓄᐃᑦ ᑎᑎᕋᐅᔭᕋᒪᕐᒪᖔᑕ. ᐃᓚᖏᑦ ᐃᓄᐃᑦ ᐅᖃᓚᐅᖅᑐᑦ ᐃᓱᒫᓘᑎᒥᖕᓂᒃ ᑭᓱᒧᑦ ᐃᑕᒪᓐᓇᐃᓕᐅᕐᑎᑦᑎᖕᒪᖔᑦ. ᐅᓚᐃᔭᓐ ᑭᐅᖃᑦᑕᓚᐅᖅᑐᖅ ᐅᑯᐊ ᑎᑎᕋᐅᔭᖅᑕᖏᑦ ᐃᒪᓐᓇᐅᔪᓐᓇᖅᑐᑦ "ᑕᑯᔭᕆᐅᕐᑎᑦᑎᓗᑎᒃ ᐊᔪᖏᑕᒥᖕᓂᒃ ᓄᓇᖅᑐᓄᑦ ᖃᓪᓗᓈᑦ ᓄᓇᖓᓂ, ᐊᒻᒪᓗ ᐱᔭᐅᔪᒫᕐᒪᑕ ᓄᐊᑕᐅᓕᕐᓗᑎᒃ ᕿᑐᖕᖓᖏᓐᓂᑦ." ᑕᒪᕐᒥᑲᓴᑦᑎᐊᖅ ᑎᑎᕋᐅᔭᖅᓯᒪᔪᑦ ᐃᓚᖃᖅᖢᑎᒃ ᐃᓄᒃᑎᑐᑦ ᑎᑎᕋᖅᓯᒪᔪᓂᒃ, ᐊᒻᒪᓗ ᑕᒪᕐᒥᑦᑎᐊᖅ ᑎᑎᕋᐅᔭᖅᑕᑎᑦ ᐊᑎᓕᐅᖅᖢᒋᑦ, ᐃᓄᒃᑎᑐᑦ, ᐃᓄᐃᔨᖓᔪᑎᑐᑦ, ᐅᒡᕙᓘᓐᓃᑦ "E-5-ᒥᒃᑎᒍᑦ" (ᐅᑯᐊ ᒐᕙᒪᒃᑯᑦ ᑐᓂᓯᒪᔭᖏᑦ ᓇᓗᓇᐃᒃᑯᑕᕆᓪᓗᒋᑦ ᓈᓴᐅᑏᑦ ᐊᑐᖅᑕᐅᓚᐅᖅᑐᑦ 1940-ᓂᑦ ᑎᑭᓪᖢᒍ 1970-ᓄᑦ). ᐅᓚᐃᔭᓐ ᐃᒡᓗᓕᖕᒧᐊᓚᐅᓐᖏᑦᑐᖅ ᑭᓯᐊᓂᓕ ᐊᐅᓪᓚᕐᑎᑦᑎᒐᒥ ᑎᑎᕋᐅᔭᕈᑎᒃᓴᖏᓐᓂᒃ ᓄᓇᓕᖕᓄᑦ ᐊᒻᒪᓗ ᑎᓕᐅᖅᖢᒋᑦ ᐃᓄᐃᑦ ᑎᑎᕋᐅᔭᖁᓪᓗᒋᑦ, ᑕᐃᒪᓗ ᖃᖓᐅᓕᕐᒪᑦ ᑎᑦᑎᖃᑯᕕᒃᑎᒍᑦ ᐱᓪᓗᒋᑦ ᐱᔭᕇᖅᓯᒪᔪᑦ.
ᐱᒋᐊᕐᓂᖓᓂ ᕕᕗᐊᕆ 1964, ᕋᐃᐊᓐ ᖃᖓᑕᓪᓗᓂ ᐃᖃᓗᒃᓂᑦ (ᑕᐃᓱᒪᓂ ᕗᓗᕕᓱᐸᐃ) ᕿᑭᕐᑖᓗᑦ ᓂᒋᐊᓃᑦᑐᖅ, ᖃᖓᑕᓪᓗᓂ ᑲᖏᕐᑐᒑᐱᒃᒧᑦ, ᓄᓇᕗᑦ. ᖃᐅᔨᒪᔭᖃᐅᓚᐅᕐᑐᖅ ᐅᓄᕐᑐᓂᒃ ᐃᓄᒃᓂᒃ ᓄᓇᓕᒃᓂ ᓯᓚᓐᓂᐊᕐᑎᐅᖃᑦᑕᓚᐅᕐᓂᕐᒥᓄᑦ ᐊᕋᒍᑦ 6 ᐊᓂᒍᕐᑐᓂ, ᐃᑲᔪᑕᐅᓚᐅᕐᑐᑦ ᐱᓕᕆᐊᖓᓄᑦ. ᐱᓇᓱᐊᕈᓯᐅᑦ ᐅᖓᑖᓂ ᑲᖏᕐᑐᒑᐱᒃᒦᓪᖢᓂ, ᐃᖃᓇᐃᔭᕐᑎᑦᑎᓪᓗᓂ ᕿᒥᖃᕐᑎᐅᔪᒥᒃ ᓂᐅᕈᑲᑕᓕᓚᐅᕐᑐᖅ ᓄᓇᓕᖃᐅᕐᑐᓄᑦ ᑎᑎᕋᕐᕕᒃᓴᓂᒃ ᑐᓂᐅᖃᐃᔭᕐᑐᕐᖢᓂ ᑕᑯᔭᕐᑐᕐᖢᓂᒋᓪᓗ ᐱᖃᓐᓇᕆᔭᓂ, ᓱᕐᓗ ᓴᑭᐊᓯ ᐋᕆᐊᖅ (ᐊᔾᔨᖑᐊᖅ). ᐋᕆᐊᖅ, ᐊᒻᒪᓗ ᓯᒥᐅᓂ ᖃᔮᖅ ᐊᒻᒪᓗ ᔭᐃᒥᓯ ᔭᐃᐳᑎ ᕿᒧᒃᓯᕐᑎᐅᓪᓗᑎᒃ, ᕿᒧᒃᓯᒃᑯᑦ ᓂᐅᕈᓚᐅᕐᑐᖅ ᒥᑦᑎᒪᑕᓕᒃᒧᑦ ᐅᖓᓯᒃᓂᖃᕐᑐᖅ ᐅᖓᑖᓂ 400 ᑭᓚᒦᑕ. ᐱᖑᓪᓗ ᑕᑯᒃᓴᐅᓪᓗᑎᒃ, ᑭᓯᐊᓂ ᖃᓂᒻᒪᕐᒧᑦ ᒪᓃᑦᑐᒧᓪᓗ ᓯᑯᒧᑦ ᑲᑐᖓᔾᔪᑎᖃᕐᖢᓂ, ᐃᖏᕋᓚᐅᕐᑐᑦ ᐅᓪᓗᓄᑦ 14−ᓄᑦ. ᒥᑦᑎᒪᑕᓕᒃᒦᓚᐅᕐᖢᓂ ᐱᓇᓱᐊᕈᓯᒐᓴᒃᓄᑦ ᑐᓂᐅᖃᐃᓪᓗᓂ ᑎᑎᕋᕐᕕᒃᓴᓂᒃ, ᖃᖓᑕᓲᒃᑯᑦ ᐃᒃᐱᐊᕐᔪᒃᒧᐊᕐᖢᓂ, ᐅᖓᓯᒃᓂᖃᕐᑐᖅ 240 ᑭᓚᒥᑕ ᐊᑭᓐᓇᖓᓂ. ᐃᒃᐱᐊᕐᔪᖕᒥᑦ, ᐅᑎᕐᐸᓪᓕᐊᓕᕐᖢᓂ ᑲᑎᑦᑎᓪᓗᓂ ᑐᓂᐅᖃᓚᐅᕐᑕᒥᓂᒃ ᑎᑎᕋᕐᓯᒪᔪᓂᒃ, ᑲᑎᑦᑎᓪᓗᓂ ᒥᑦᑎᒪᑕᓕᒃᒥᑦ, ᐊᒻᒪᓗ ᑲᖏᕐᑐᒐᐱᒃᒥᑦ ᐃᖃᓗᒃᓄᑦ ᐅᑎᑕᐃᓐᓇᕐᖢᓂ ᒪᐃ 1964. ᐱᔭᒃᓴᒥᓄᑦ ᐅᑎᕐᖢᓂᓗ ᑭᖓᓄᑦ ᐊᐅᔭᐅᓕᕐᑎᓪᓗᒍ. ᓂᐅᕕᕐᑎᒃᑯᑦ ᓇᒃᓯᐅᔾᔨᖃᑦᑕᓚᐅᕐᑐᑦ ᑎᑎᕋᒃᑯᕕᒃᑯᑦ ᕋᐃᐊᓐᒧᑦ ᑕᕿᒐᓴᒃᓂᒃ.
ᑭᒃᑰᓂᖏᓐᓂᒃ ᐅᓂᒃᑳᕐᓂᖅ
ᑎᐅᓕ ᐅᓚᐃᔭᓐ ᐃᓅᓂᑯ ᑐᓛᓐᑐᒥ 1933-ᖑᑎᓪᓗᒍ ᐊᒻᒪᓗ ᐃᓕᓐᓂᐊᕈᑎᒥᓂᒃ ᐃᓱᓕᑦᑎᓪᓗᓂ ᐋᓐᑎᐅᕆᐅ ᓯᓚᑦᑐᖅᓴᕐᕕᖓ ᑎᑎᕋᐅᔭᖅᓯᒪᔪᓂᒃ ᓴᓇᖑᐊᖅᓯᒪᔪᓂᒃ ᐊᒻᒪᓗ ᓴᓇᓯᒪᔪᓐᓇᖅᑐᓂᒃ ᑕᐃᑲᓂ 1954. ᐊᐅᓪᓚᕆᐅᓚᐅᖅᑐᖅ ᐅᑭᐅᖅᑕᖅᑐᒧᑦ 1956 ᓯᓚᓐᓂᐊᕐᑎᐅᓪᓗᓂ ᑲᖏᖅᖢᒑᐱᖕᒥ ᐊᒻᒪᓗ ᑕᐃᑲᓃᓪᖢᓂ ᐅᑭᐅᓄᑦ ᒪᕐᕉᖕᓄᑦ. ᐃᖃᓇᐃᔭᓕᖅᑎᑕᐅᓚᐅᖅᑐᖅ ᒍᐃᔅ ᕿᑭᖅᑖᓗᒃ ᐃᔅᑭᒨ ᑯᐊᑉ 1960-ᒥ ᓴᓇᖕᖑᐊᖅᓯᒪᔪᓂᒃ ᐅᖃᐅᔾᔪᐃᔨᐅᓪᓗᓂ ᐱᒋᐊᓕᓵᑦᑎᐊᖅᑎᓪᓗᒍ ᑎᑦᑎᖅᑐᒐᐅᔭᕐᕕᒃ ᑭᓐᖓᓂ, ᓄᓇᕗᑦ, ᐊᒻᒪᓗ ᖁᕙᕆᐊᖅᑕᐅᓪᓗᓂ ᐃᖅᑲᓇᐃᔮᖓ ᐊᖓᔪᖅᑳᖑᖅᖢᓂ ᓴᓇᔨᓄᑦ ᑕᐃᑲᓂ 1962. ᐅᓚᐃᔭᓐ ᑭᓐᖓᓂ ᓄᓇᖃᓚᐅᖅᑐᖅ 30 ᐅᑭᐅᓄᑦ ᐊᖓᔪᖅᑳᖑᓪᓗᓂ ᓴᓇᔨᓄᑦ, ᐃᓂᖃᕋᒥ ᐱᒻᒪᕆᐅᔪᒥᒃ ᓴᓈᖃᖅᖢᓂ ᐱᓕᕆᕕᒋᓚᐅᖅᑕᖏᑦ ᐱᖓᓱᑦ ᑭᖑᓕᕇᑦ ᑎᑦᑎᖅᑐᒐᕐᑎᑦ, ᓴᓇᓐᖑᐊᖅᑎᑦ, ᐊᔾᔨᓕᐅᕆᔨᑦ ᐊᒻᒪᓗ ᒥᖅᓱᖅᑐᑦ ᑭᓐᖓᓂ. ᑕᐃᑲᓂ 2000, ᐅᓇ ᑐᑭᒧᐊᒃᑎᑖᕆᔭᐅᓚᐅᖅᑐᖅ ᑭᓐᖓᓂᑦ ᓴᓇᔭᐅᔪᓄᑦ, ᑕᐃᑲᓂ ᒍᐃᔅ ᐸᕕᓐ ᐃᔅᑭᒨ ᑯᐊᑉ ᐃᓂᖓ ᑐᓛᓐᑐᒥ-ᓂᐅᕐᕈᓯᕆᕕᐅᔪᖅ ᐃᓂᖓᓂ ᐊᒻᒪᓗ ᑕᐃᑲᓃᓪᖢᓂ ᐃᖅᑲᓇᐃᔭᕈᓐᓇᕐᓂᓂ ᑎᑭᓪᖢᒍ ᐃᓱᓕᓐᓂᖓᓄ 2008-ᒥ.
ᓱᓇᑐᐃᓐᓇᒥᒃ ᐱᑦᓯᐊᓕᓲᖅ ᐊᒻᒪᓗ ᐱᓕᕆᐊᒥᓂᒃ ᖃᐅᔨᒪᑦᓯᐊᖅᑐᖅ ᐊᐅᓚᑦᓯᔨ, ᐅᓚᐃᔭᓐ ᐅᖃᐅᔾᔪᐃᔨᐅᓚᐅᖅᑐᖅ "ᐃᓄᓕᒫᓄᑦ ᒪᑐᐃᖓᔪᖅ ᓴᓇᓐᖑᐊᕐᕕᒃ" ᐊᑐᐊᒐᖅ ᐅᓇᓗ ᑲᑎᖓᑎᑦᑎᕙᒃᑐᖅ ᖃᓄᕆᑦᑐᑐᐃᓐᓇᓂᒃ ᖃᓪᓗᓈᑦ ᓄᓇᖓᓂ ᓴᓇᓐᖑᐊᖅᑎᓂᒃ ᑭᓐᖓᓄᑦ ᒪᑐᐃᖓᑦᑎᐊᖅᑐᖅ ᑲᑎᒪᕕᒃ ᐅᑯᐊᓗ ᐃᓱᒪᓕᕈᑏᑦ ᐊᒻᒪᓗ ᐊᔪᖏᑕᐅᔪᑦ ᖃᐅᔨᒪᓕᕐᑎᑦᑎᔾᔪᑕᐅᓪᓗᑎᒃ ᐊᕙᑖᓂᑦ ᐅᑭᐅᖅᑕᖅᑐᖅ ᐊᒻᒪᓗ ᖃᓪᓗᓈᑦ ᓄᓇᖓᓂ ᓴᓇᖕᖑᐊᖅᑎᑦ. ᖃᐅᔨᒪᔭᐅᓕᕐᑎᓚᐅᖅᑕᖓ ᑭᓐᖓᐃᑦ ᓴᓇᖑᐊᕈᓯᖓ ᓴᓇᓐᖑᐊᖅᓯᒪᔭᖏᓐᓂᒃ ᑕᖃᓚᐅᖅᓯᒪᒐᓂ, ᐃᑲᔪᖅᑐᖅ ᑕᐃᒃᑯᓂᖓ ᓄᓇᕐᔪᐊᒥᑦ ᖃᐅᔨᒪᔭᐅᓕᖅᑎᓪᖢᒋᑦ ᑕᑯᔭᐅᑎᓪᖢᒋᑦ, ᐊᒻᒪᓗ ᑎᓕᐅᕆᔪᖅ ᓴᓇᖑᐊᖅᑏᑦ ᖃᓄᑐᐃᓐᓇᖅ ᐊᔪᕈᓐᓃᖅᓴᖃᑦᑕᕐᓗᑎᒃ ᐱᔭᕆᐅᖅᑕᖃᑦᑕᖅᓗᑎᒃ ᖃᐅᔨᓇᓱᒡᓗᑎᒃ ᓲᕐᓗ ᑕᒪᒃᑯᓂᖓ ᔭᕐᕋᒃᓴᐃᑦ, ᐱᕐᕋᕐᓂᖅ, ᑎᑎᖅᑐᒐᕐᓂᖅ, ᐊᒻᒪᓗ ᓄᒃᑕᕈᓐᓇᖅᑐᓂᒃ. ᐊᔭᐅᖅᑕᖏᑦ ᑭᓐᖓᐃᑦ ᑎᑎᖅᑐᒐᕐᕕᖓ ᓯᕗᒻᒧᐊᒃᑎᓪᖢᒍ, ᓯᕗᓕᐅᖅᑎᖢᒍ ᑖᓐᓇᕈᖅᖢᒍ ᑲᓇᑕᒥ ᐊᑯᓂᐅᓛᒥᒃ ᐃᖏᕐᕋᔪᖅ ᐊᐅᓚᔪᖅ ᒐᕙᒪᐅᓇᓂ ᑎᑦᑎᖅᑐᒐᕐᕕᒃ. ᐅᓇ ᐃᓕᓴᕆᓗᒍ ᐊᒃᓱᕉᑎᖃᓚᐅᕐᓂᖓ ᐊᒻᒪᓗ ᑲᔪᓯᑦᑎᐊᕐᑎᑦᑎᓯᒪᓂᖓ, ᐃᓚᒋᔭᐅᓕᖅᑎᑕᐅᓯᒪᔪᖅ ᑲᓇᑕᒥᑦ ᐅᔭᒥᒃᑕᐅᓯᒪᓪᓗᓂ ᑕᐃᑲᓂ 1983 ᐊᒻᒪᓗ ᑐᓂᔭᐅᓯᒪᔪᖅ ᒐᕗᓄ ᔭᓄᓗ ᐃᓕᓴᖅᓯᔾᔪᑖᓂᒃ ᑕᑯᔭᐅᔪᓐᓇᖅᑐᓂᒃ ᐊᒻᒪᓗ ᓱᓇᑐᐃᓐᓇᓂᒃ ᓴᓇᓐᖑᐊᖅᑐᓕᕆᓂᖅ 2010-ᒥ.
